देवचुलीमा छिट्टै खेल मैदान निर्माण हुने

२०७७ चैत्र १४, शनिबार प्रकाशित (३ साल अघि) १२८० पाठक संख्या

देवचुली। युवाहरुमा क्षमता भएपनि अभ्यास गर्नका लागि उपयुक्त खेल मैदान नभएपछि धेरै ठाउँमा खेलाडीहरुले आँफू भित्र लुकेको प्रतिभालाई देखाउन पाइरहेका छैन्न । पछिल्लो समय नेपालमा युवाहरुमा खेलकुदको क्रेज बढ्दै गइरहेको छ तर खेलप्रेमीको प्रतिभालाई प्रस्फुटन गर्ने खेलमैदान नहुँदा खेलाडीहरु ओझेलमा परिरहेका छन् ।

यस्तै भएको छ देवचुली वडा नं ४ मा पनि वडामा थुप्रै राष्ट्रिय तथा अन्तर्राष्ट्रिय स्तरमा पदक हासिल गर्ने खेलाडीहरु जन्मिएका छन् तर वडामा गतिलो खेलमैदान नहुँदा खेलाडीहरु पछि परेका छन् ।

खेलाडीहरुको जमात बढ्न थालेपछि पछिल्लो केही बर्षयता स्थानीय तहले खेलकुदमा रकम विनियोेजित गरि विभिन्न आवश्यक खेलकुद सामाग्री र कार्यक्रमहरु आयोजना गर्न थालेका छन् ।

वडामा लुकेर बसेका खेलप्रेमीहरुलाई अगाडि बढाउने उद्धेश्यले प्रत्येक बर्ष देवचुली वडा नं ४ मा फुटबल प्रतियोगिता गर्दै आइरहेको छ। देवचुली वडा नं ४ मा अन्य विभिन्न खेलको आयोजना गर्ने जमर्काे गरेपनि वडाभित्र उपयुक्त खेल मैदान नहुँदा ठुला खेल खेलाउन नसकिएको देवचुली वडा नं ४ का वडाध्यक्ष गिर बहादुर थापा क्षेत्री (राम) ले गुनासो गर्नुभयो ।

उहाँले आगामी दिनमा यो क्षेत्रलाई खेल जगतबाट अगाडि बढाउनका लागि विभिन्न ठाउँबाट आर्थिक सहयोगको व्यवस्थापन गरि खेलमैदान निर्माण गर्ने वडाध्यक्ष क्षेत्रीले जानकारी गर्नुभयो । अहिले वडामा स–सानो चौर, बारी जस्ता ठाउँमा खेलाडीहरु खेल खेल्न बाध्य भएको बताउँदै छिट्टै नै खेलमैदान निर्माण गर्ने बताउनुभयो ।

क्षेत्रीले यहाँका युवाहरुलाई खेलमा अगाडि बढाउनका लागि अबको एक बर्षमा लिज अथवा भाडामै भएपनि खेलमैदान निर्माण गर्ने बताउनुभयो । “स्वास्थ्यका लागि खेलकुद, राष्ट्रका लागि खेलकुद” भन्ने नाराका साथ देवचुली वडा नं ४ मा दोस्रो नकआउट वडाध्यक्ष कप भलिबल प्रतियोगिता झाँक्रे शान्तिगैरामा भइरहेको छ ।

कृयटिभ यूवा संजालको आयोजना, मिनिभ्याली खेलकुद समिति र देवचुली वडा नं ४ को आर्थिक सहयोगमा चैत ११ गते देखि शान्तिगैरामा सुरु भएको दोस्रो नकआउट वडाध्यक्ष कप भलिबल प्रतियोगिता चैत १५ गते आइतबार समापन हुनेछ । प्रतियोगितामा सहभागी प्रथम हुने टिमलाई ३० हजार, दोस्रो हुनेलाई टिमलाई २० हजार र तेस्रो र सान्त्वना हुने टिमलाई आकर्षक पुरस्कारको व्यवस्था गरिएको आयोजकले जनाएको छ ।