साहित्यकार घन थापाको ‘तिमीलाई नै’ म्युजिक भिडियो सार्वजनिक

नवलपुर न्युज

२०७८ कार्तिक १३, शनिबार प्रकाशित (३ साल अघि) १७१५ पाठक संख्या

काठमाडौं । साहित्यकार तथा गीतकार घन थापाको ‘तिमीलाई नै’ म्युजिक भिडियो सार्वजनिक भएको छ ।

ईनाक्षी ईन्टरटेन्मेंट अस्ट्रेलियाको प्रस्तुतिमा गीतकार घन थापाको शब्द, दिपकराज विश्वकर्माको सङ्गीत, किरण भूजेल र मेलिना मैनालीको स्वर तथा अभिनयमा नयाँ गीत “तिमीलाई नै” शुक्रबार सार्वजनिक भएको हो ।

भिडियो सार्वजनिक भएपछि आफ्नो गीतलाई दर्शकले रुचाउने र नेपाली संगीतलाई बढावा दिने गीतकार घन थापा बताउनु हुन्छ । गीत संगीतप्रति सानैदेखि लगाव भएकोले ब्यस्त जीवनबाट थोरै समय निकाल्दै संगीतलाई निरन्तरता दिएको गीतकार  थापा बताउनु हुन्छ ।

कविता, कथा, लघुकथा, बालकथा, मुक्तक, रेडियो नाटक, नियात्रा, पुस्तक समीक्षा, लेखरचनामा लामो समयदेखि कलम चलाउँदै आएका थापाको यो पहिलो गीत रचना हो । विभिन्न साहित्यिक पुरस्कारद्वारा पुरस्कृत थापाको पहिलो गीत रचना नै निकै सशक्त देखिन्छ । सुन्दा कर्णप्रिय लाग्ने गीतका शब्द गहन छन्।

उक्त म्युजिक भिडियोमा गायक किरण भुजेल र गायिका मेलिना मैनालीको युगल आवाज रहेको छ । दिपकराज बिश्वकर्माको संगीत रहेको प्रेमिल गीतको म्युजिक भिडियोमा अभिनय समेत गायक किरण भुजेल र गायिका मेलिना मैनालीकै रहेको छ ।

पछिल्लो समय निकै व्यस्त गायक किरण भुजेल रियालिटी सो नेपाल आईडलबाट चर्चामा आएका हुन् । भुजेलले आफ्ना धेरै जसो गीतहरुको भिडियोमा आफै नै अभिनय गर्ने गर्छन् । यता नेपाली गायन रियालिटी सो ‘द भ्वाईस अफ् नेपाल’बाट  गायनमा चर्चा चुलिएकी गायिका मेलिना मैनालीले यस भिडियोमा उत्कृष्ट अभिनय समेत गरेकी छन् ।

दिपकराज विश्वकर्माले संगीत, मिक्सीङ् र एरेन्ज गरेको गीतको भिडियो निर्देशन पनि दिपकराजकै रहेको छ । पछिल्लो समय निकै नै चर्चामा छन् संगीतकार दिपक । दिपक संगीत भर्ने, एरेन्ज गर्ने, मिक्सीङ् गर्नुका साथै भिडियो निर्देशनमा पनि संलग्न छन् ।