कावासोतीमा अटो चालक मृत अवस्थामा भेटिए, कुकुर मगाइयो

नवलपुर न्युज

२०७८ माघ १८, मंगलबार प्रकाशित (२ साल अघि) २११७ पाठक संख्या

“बागमती प्रदेश प्रहरी कार्यालयबाट विशेष तालिम प्राप्त कुकुर मगाइयो”

कावासोती । नवलपुरमा एक अटो चालक मृत अवस्थामा फेला परेका छन्।  कावासोती नगरपालिका वडा नं १३ गैरी घर भएका ५२ वर्षीय माधवप्रसाद गिरी घर नजिकैको घोलमा मृत फेला परेका हुन् ।

कावासोती नगरपालिका वडा नं १३ का अध्यक्ष विनोद रानामगरले गिरीको शव घर नजिकैको घोलमा गाडिएको अवस्थामा फेला परेको जानकारी दिए । ‘सडक छेउमा उनले चलाउने अटो रोकिएको छ र घोलको हिलोमा शव गाडेर माथिबाट कर्कलाको पातले छोपेर राखिएको अवस्थामा पाइएको छ,’ रानामगरले भने ।

वडाध्यक्ष रानामगरका अनुसार गएराति घरमै बसिरहेका गिरीलाई अपरिचित व्यक्ति आएर अटोमा पुर्याइदिन भनेपछि उनी घरबाट निस्किएका थिए । उनको हत्या भएको हुन सक्ने प्रारम्भिक अनुमान गरिएको स्थानीयको भनाइ छ ।

गिरी आफैले चलाउँदै आएको अटो रोकिएको अवस्थामा र उनको शव नजिकै घोलको हिलोमा गाडिएर कर्कलाको पातले छोपिएको अवस्थामा भेटिएको स्थानियहरुले बताएका छन् । उनी गएराति अपरिचित व्यक्ति आएर अटोमा पुर्याइदिन भनेपछि बाहिर निस्किएका गिरीको हत्या भएको हुन सक्ने अनुमान गरिएको छ ।

नवलपुर प्रहरीका डिएसपी दिलिप कुमार गिरीले शवलाई अहिले खाल्डोबाट बाहिर निकालिएको र घटनाको अनुसन्धान भैरहेको बताए । अनुसन्धानका लागि बागमती प्रदेश प्रहरी कार्यालयबाट विशेष तालिम प्राप्त कुकुर मगाइएको उनले जानकारी दिए । घटनास्थलमा एसपी प्रज्ज्वल महर्जन पनि पुगेका छन् । उनका अनुसार मृतकको टाउकोमा चोट लागेको छ। शव पोष्टमार्टमको लागि जिल्ला अस्पताल लगिएको छ।