कावासोतीमा अटो चालकको हत्यागर्ने मुख्य अभियुक्त पक्राउ

नवलपुर न्युज

२०७८ माघ २७, बिहिबार प्रकाशित (२ साल अघि) २४९९ पाठक संख्या

कावासोती । नवलपुरको कावासोतीमा अटो चालकको हत्याका मुख्य अभियुक्त पक्राउ परेका छन् । गत साता कावासोतीको गैरीमा एक अटो चालकको हत्यामा संलग्न भएको आरोप लागेका पृथ्वी भुजेललाई जिल्ला प्रहरीले झापाबाट पक्राउ गरेको जनाएको छ ।

जिल्ला प्रहरीका अनुसार गत माघ १७ गते अटो चालक ५२ वर्षीय माधव गिरी र भुजेलले साँझ सँगै गाउँमा मदिरा पिएको र त्यसै राति गिरीको हत्या भएको थियो । हत्या भएपछि फरार भएका भुजेललाई भारतबाट पक्राउ गरेर बुधबार झापामा ल्याइएको प्रहरी श्रोतले बताएको छ । उनलाई कावासोतीबाट गएको प्रहरीको टोलीले ल्याउँदै गरेको बुझिएको छ ।

जिल्ला प्रहरीले चालक हत्यामा संलग्न रहेको भन्दै खोजी गरिरहेका गिरी मृतकका गाउँलेसमेत हुन् । कावासोती नगरपालिका वडा नम्बर १३ गैरी गाउँका ती अटो चालकको हत्या गरेर घोलको हिलोमा पातले छोपिएको अवस्थामा शव भेटिएको थियो ।

शव पानीमा गाडेपछि हत्यारा पत्ता लगाउन कठिन हुने मनसायले त्यसो गरेको हुन सक्ने प्रहरीको भनाइ छ । स्थानीयका अनुसार भुजेल जीविकोपार्जनका लागि ज्याला मजदुरी गर्छन् ।

ती अटो चालकको आफ्नै घरबाट करिब ८ सयमिटर उत्तरमा उनको शव अघिल्लो मंगलबार बिहान भेटिएको थियो। प्रहरीले तालिम प्राप्त कुकुर प्रयोग गरी अनुसन्धान गरेको थियो । घटना भएकै दिनदेखि फरार रहेका भुजेललाई प्रहरीले निरन्तर खोजी गरिरहेको थियो । गत १८ गते बिहान गाउँमा दुध छोड्न हिँडेका व्यक्तिले बाटोमा अटो पल्टिएको देखेपछि गाउँमा खबर पुगेको थियो र प्रहरीलाई जानकारी गराइएको हो ।

त्यतिखेर घटनास्थल वरपर सिक्री, २ थान मोबाइल र जुत्ता फेला परेको थियो । हत्या अभियोगमा यसअघि नै पक्राउ परेका भुजेलका आफन्तले घटनाको दिनमा भुलेज पनि सँगै रहेको बयान दिएको प्रहरी श्रोतको भनाइ छ । घटनास्थलमा फेला परेको मोबाइलको आधारमा अनुसन्धान अघि बढाएको प्रहरीले जनाएको छ ।