मोटरसाइकल दुर्घटना : दुईको मृत्यु, एकजना घाइते

नवलपुर न्युज

२०७८ फागुन ३, मंगलबार प्रकाशित (२ साल अघि) १४९२ पाठक संख्या

बुटवल । रूपन्देहीमा  मोटरसाइकल दुर्घटना हुँदा दुईजनाको मृत्यु भएको छ । जिल्लाको बुटवल उपमहानगरपालिका–१२ मिलन चोकमा आज बिहान भएको दुर्घटनामा दुईजनाको मृत्यु भएको हो । प्रहरीका अनुसार दुर्घटनामा एकजना गम्भीर घाइते भएका छन् ।

तीनजना चढेको लु ६० प ३६५२ नम्बरको मोटरसाइकल आज बिहान चार बजे अनियन्त्रित भएर पल्टिँदा मोटरसाइकलमा पछाडि सवार गैडहवा गाउँपालिका–९ हात्तीबजारका २० वर्षीय प्रेम रुचाल र सोही ठाउँका २० वर्षीय राहुल थापाको मृत्यु भएको प्रहरीले जनाएको छ ।

इलाका प्रहरी कार्यालय बुटवलका अनुसार दुवै जनाको उपचारको क्रममा बुटवलस्थित लुम्बिनी प्रादेशिक अस्पतालमा मृत्यु भएको हो । दुर्घटनामा गम्भीर घाइते भएका मोटरसाइकल चालक रूपन्देहीकै २१ वर्षीय विमल रानाको सोही अस्पतालमा उपचार भइरहेको छ ।