नवलपुरमा उम्मेदवारलाई नयाँ शर्त : ‘नो पूर्जा नो भोट’

नवलपुर न्युज

२०७८ चैत्र २२, मंगलबार प्रकाशित (२ साल अघि) १३९६ पाठक संख्या

नारायण शर्मा 

देवचुलीका भूमिहीन तथा सुकुम्बासीहरूले आफ्नो बस्तीमा भोट माग्दै हिँड्ने नेताहरूलाई प्रवेश गर्न नै नदिने अडान राखेका छन् । उनीहरूले पूर्जा नपाएसम्म मतदान नगर्ने भनेका छन् ।

पूर्वी नवलपरासी — नवलपरासीको देवचुली नगरपालिकाका भूमिहीन तथा सुकुम्बासीहरूले आफूहरूले दशकौंदेखि कमाउदै आएको जग्गाको पूर्जा नपाएसम्म स्थानीय तहको निर्वाचनमा मतदान नगर्ने अडान लिएका छन् ।

निर्वाचनको मुखैमा उनीहरुले आफ्नो टोलमा भोट माग्न आउने सबै दलका नेता र उम्मेदवारलाई पहिला जग्गाधनी लालपूर्जा लिएपछि मात्रै भोट हाल्ने भन्दै दबाब दिएका छन् ।

पछिल्लो केही दिनयता उनीहरुले ‘नो पूर्जा नो भोट’ जस्ता नारा लेखिएका ब्यानर बोकेर दिनहुँ रुपमा आन्दोलन गर्दै आएका छन् । देवचुली नगरपालिका वडा नम्बर ४ र ५ का स्थानीयले पूर्जा नपाएसम्म मतदानमा भाग नलिने अडान राख्दै आएका हुन् । उनीहरुले मत माग्न आउनेहरुलाई आफ्नो वडामा प्रवेश गर्नसमेत दिएका छैनन् । भोट माग्न जानासाथ आफ्नो टोलमा छिर्न नदिएपछि जिल्लाका मुख्य राजनीतिक दलका नेताले सुकुम्बासी बस्तीमै गएर जग्गाधनी पूर्जा दिलाउन सबै प्रयास गर्ने सामूहिक प्रतिबद्धता जनाए पनि स्थानीयहरू विश्वस्त हुन सकेका छैनन् ।

४ दशकभन्दा बढी समयदेखि जग्गा जोतभोग गर्दै आए पनि पूर्जा नपाएका पीडितले पूर्जा नपाएसम्म दलका नेताहरूलाई भोट माग्न पनि टोलमा जान नदिने अडान लिएका छन् । स्थानीय रामबहादुर अधिकारीका अनुसार उनीहरूले पटक पटक टोलमा छिर्न नदिने जनाउ दिएका छन् ।

वडा नम्बर ४, ५, १३ र १७ वडामा दशकौंदेखि बसोबास गर्दै आएका स्थानीयले जोतभोग गर्दै आएको जग्गाको पूर्जा पाएका छैनन् । ती सबै वडामा १ हजारभन्दा बढी परिवारसँग जग्गा धनी पूर्जा छैन । वडा नम्बर ४ का भने सबै सुकुम्बासी हुन् ।

झाक्रेगाउँका स्थानीय गणेश गुरुङदे भने नेताहरुले सधैँ ढाँटेर आफूहरुलाई ठग्दै आएको दुखेसो गरे । सबै दलका नेताले पूर्जा दिने आश्वासन दिए पनि पूर्जा नपाएको उनको गुनासो छ । गुरुङले भने ‘हाम्रो माग सम्बोधन नगरेसम्म निर्वाचनमा भोट हाल्दैनौं ।’

वडा नम्बर ५ का अध्यक्ष शिवलाल सापकोटा भने वर्षौंदेखि भोगचलन गर्दै आएको जग्गाको पूर्जा चाहियो भन्ने स्थानीयको माग जायज भएको बताउँछन् । सबैजसो दलका नेताले निर्वाचनमा जग्गाधनी पूर्जा दिन्छौं भन्दै भोट मागे पनि दशकौंसम्म पूर्जा नपाएका सुकुम्बासीले संयुक्त आवाज उठाएको वर्षौं भइसकेको सापकोटा बताउँछन् । वडा नम्बर ४ मा ८ सय ५५ परिवार र वडा नम्बर ५ मा २ सय ९९ परिवार सुकुम्बासी बसोबास गर्छन् । १३ नम्बर वडाको बोटेटोलमा भने करिब २ सय परिवार सुकुम्बासी बसोबास गर्दै आएका छन् ।

यहाँका मुख्य दलका नेताहरुले भने उनीहरुले चर्चेको जग्गाको जग्गाधनी पूर्जा दिलाउन हरसम्भव प्रयास गर्ने सामूहिक प्रतिबद्धता जनाएका छन् । ५ दिनअघि नेपाली कांग्रेस, एमाले, माओवादी केन्द्र र जनता समाजवादी पार्टीका जिल्ला नेताहरुले झाक्रेमा आयोजित भेलामा बसोबास गर्ने सबैलाई चाँडो भन्दा चाँडो जग्गाधनी पूर्जा दिलाउन पहल गर्ने प्रतिबद्धता जनाएका थिए । एमाले प्रदेश सभासदस्य रोशन बहादुर गाह, नेपाली कांग्रेसका प्रदेश सभासदस्य विष्णु लामिछाने, नेता महेन्द्रध्वज जिसी सहितका दर्जनौं नेताहरुले सुकुम्बासीकै रोहवरमा आयोग बन्नासाथ पूर्जा वितरण गर्न सघाउने र त्यसको जिम्मेवारी दलहरुले लिने प्रतिबद्धता जनाएका थिए ।

स्थानीय शिवलाल क्षेत्री भने आफूहरू नेताहरूका यस्ता प्रतिबद्धतामा विश्वास नगर्ने बताउँछन् । ‘नेताले पूर्जा दिन्छौं भन्दै भोट माग्दै ढाँट्न थालेको ४० वर्ष भइसक्यो कसरी विश्वास गर्ने ?’ क्षेत्रीले भने ।