‘पहिलो कार्यकालमा सुरु भएका योजनाहरु पूरा गर्न फेरि उम्मेदवारी दिएको हुँ’

नवलपरासी सुस्ता पूर्वको विनयीत्रिवेणी गाउँपालिकामा पनि निर्वाचनको चहलपहल उत्तिकै छ। कांग्रेसबाट गाउँपालिका अध्यक्ष जितेका डम्बरबहादुर जि.सी. यसपटक फेरि अध्यक्ष पदमै प्रतिस्पर्धामा छन् ।

उनीसँग पछिल्लो पाँच वर्षको कार्यकाल र निर्वाचनका एजेण्डालगायतका विषयमा गरेको कुराकानीको सम्पादित अंश :

फेरि अध्यक्षमा दोहोरिन प्रतिस्पर्धामा हुनुहुन्छ । तपाई नै किन फेरि अध्यक्ष पदमा ?

मेरो उम्मेदवारी अघिल्लो कार्यकालमा पूरा गर्न नसकेका अधुरा विकास निर्माणका काम पुरा गर्नका लागि हो । कतिपय विकास निर्माणका कामहरु समय अपुग भएकाले अधुरै छन् ।

मैले थालेका अधुरा योजनाहरु, मैले अघिल्लो पटक गरेका प्रतिबद्धताहरु कार्यान्वयनकै चरणमा छन् । ति सबै योजना र प्रतिबद्धता पुरा गर्न फेरि उम्मेदवारी दिएको हुँ ।

मतदाताले फेरि तपाईलाई दोहो¥याउनुहुन्छ भन्नेमा कत्तिको आशावादी हुनुहुन्छ ?
मलाई विश्वास छ, जनताहरुले यो पटक पनि मलाई नै रोज्नुहुनेछ । मेरो कार्यकालमा मैले गरेका कामहरुको मुल्याङ्कन पक्कै गर्नुभएको छ । मेरो कामका बारेमा सबै जनता जानकार नै हुनुहन्छ । त्यसैले दोहोरिदा पनि धेरैको सकारात्मक उर्जा पाइरहेको छु ।

तपाई गठबन्धनबाट उम्मेदवार हुनुहुन्छ, गठबन्धनका कारण सजिलो महसुस गर्नुभएको हो ?

सुरुमा गठबन्धनभित्र केहि असन्तुष्टिहरु देखिएका हुन् । अहिले सबैसँग सहमतिको प्रयास भइरहेको छ । सबैलाई समेट्नेमा हामी छलफल गरिरहेका छौं ।  मलाई लाग्छ, यो गठबन्धनको औचित्य सबैले बुझ्नुभएको छ । हामी प्रतिगमनविरुद्ध एक ठाँउमा उभिएका शक्तिहरु अझ मजबुत हुनुपर्छ भन्ने गठबन्धनका सबै साथीहरुलाई लागेको छ । त्यसैले भोट नदिने त कुरा नै आउदैन ।

विपक्षी कमजोर छन् भन्न खोज्नुभएको हो ?

हाम्रो प्रतिस्पर्धा एमालेसँग नै हो । तर जनताको समर्थनले गर्दा खासै चूनौति देखेको छैन ।

तपाईलाई नै भोट किन दिने ?

म एउटा अनुभवी पनि हुँ । यसअघि पनि मैले जनताको भावना अनुसार काम गरेको हुँ । हाम्रो श्रोत के हो ? जनप्रतिनिधिले के के गर्न सक्छन् भन्ने सबै मलाई थाहा भयो । सबै कुराको अनुभव भएकाले म फेरि उम्मेदवारको रुपमा आएको हुँ । विकास गर्न पनि समय लाग्दो रहेछ ।

यसअघिको कार्यकालमा सुरुवात भएका आयोजनाहरु पुरा गर्न र यो विनयीत्रिवेणी गाउँपालिकालाई अझ व्यवस्थित र विकसित बनाउनका लागि पनि मेरो नेतृत्व आवश्यक छ ।

तपाईका प्राथमिकताहरु के के हो ?

मेरो एजेण्डा भनेको बाटो, खानेपानी र शिक्षा नै हो । सबैभन्दा पहिले शिक्षा, स्वास्थ्य र खानेपानीलाई अझ व्यवस्थित र गुणस्तरीय बनाउने हो । त्यसपछि यहाँको आवश्यकता अनुसार नै म अगाडि बढ्ने हो ।

तपाईले प्रतिवद्धता गरेका बिषय पूरा गर्ने श्रोत के हो ?

श्रोत त संघले पनि बजेट छुट्याएकै हुन्छ । यस्तै प्रदेशमा पनि बटेज छुट्याउँछ । हाम्रो स्थानीय सरकारले पनि बजेट बनाउछौँ । अरु सहायता पनि खोज्ने गरेका छौँ ।

मैले पहिलो कार्यकालमा पनि संघ र प्रदेशसँग जुध्ने योजना र कार्यक्रम बनाएन । त्यसो गर्दा एउटै कार्यक्रममा दोहोरो बजेट पर्ने भएन र त्यो बजेट अन्य ठाँउमा खर्च गर्न सकियो । यो पटक पनि म बजेट व्यवस्थापनलाई नै ध्यान दिनेछु ।

मतदाताको प्रतिक्रिया कस्तो पाउनुभएको छ ?

मतदाताहरुले निकै सकारात्मक प्रतिक्रिया दिनुभएको छ । मेरो उम्मेदवारी पर्दा धेरै खुसी पनि हुनुभएको छ । तपाई अगाडि बढ्नुस्, हामी पछाडि छौँ भन्नुहुन्छ । समग्रमा मलाई सहयोग नै गरिरहनुभएको छ ।

कामको प्राथमिकरण गर्नुपर्दा पहिलो प्राथमिकता कुन कामलाई दिनुहुन्छ ?

मैले सधै भन्ने गरेको छु कि मेरो पहिलो कार्यकालमा शुरु गरेका योजना पुरा गर्न नै मेरो दोस्रो पटक उम्मेदवारी हो । यहाँको सुकुम्वासी समस्या र अव्यवस्थित जग्गाहरुको व्यवस्थापन नै हो ।  सुकुम्वासी समस्या समाधान नै मेरो पहिलो काम हुनेछ ।