जनताको जीवनमा परिवर्तन ल्याउने गरी काम गर्ने तागत र क्षमता हामीसँग छ: विष्णु कुमार कार्की

नवलपुर न्युज

२०७९ कार्तिक १५, मंगलबार प्रकाशित (२ साल अघि) ५५६ पाठक संख्या

कवासोती  । नवलपुरको प्रतिनिधि सभा सदस्य निर्वाचन क्षेत्र नं; २ का बाम–लोकतान्त्रिक गठबन्धनका साझा उम्मेदवार एवं नेपाली कांग्रेसका नेता बिष्णु कुमार कार्कीले नवलपुरको समग्र विकासको जिम्मा अब बन्ने बामलोकतान्त्रिक गठबन्धनको सरकारले लिने बताए।

कावासोती नगरपालिकाको वडा नं; १४ स्थित त्रिभुवनटारमा बाम–लोकतान्त्रिक गठबन्धनले आज आयोजना गरेको ‘वडा सम्पर्क कार्यालय उद्घाटन एवम् भेटघाट ’ कार्यक्रममा सम्बोधन गर्दै कार्कीले आफूहरुसँग कसरी विकास गर्ने, विकासका लागि कुन कुन ठाउँमा पुग्नुपर्छ भन्ने अनुभव र क्षमता भएकाले आफूहरुबाट विकास सम्भव हुने बताएका हुन् ।

उनले भने, ‘हामी काम गर्न सक्ने तागत क्षमता भएको उम्मेदवार हौँ । बजेट ल्याउने र काम गर्ने तौर तरिका हामीलाई थाहा छ । ठूला कुरा गरेको होइन, कसरी विकास गर्ने भन्ने तागत र क्षमता दुवै हामीसँग छ।’

आफूहरुको मुख्य प्राथमिकता जनताको जीवन परिवर्तन गराउनेमा रहने भन्दै उनले आगामी ५ वर्ष जनताको समस्या समाधान गर्ने काममा आफूहरु केन्द्रित हुने बताए । उनले प्राप्त अधिकारलाई संरक्षण गर्नका लागि गठबन्धनलाई भोट दिन आवश्यक भएको तर्क राख्दै एमालेले लोकतन्त्रको आधारस्तम्भ भत्काउने काम गरेको समेत औल्याए ।

उम्मेदवार कार्कीले आफूहरुले जनताको बीचमा साँचो बोल्ने र बोलेको कुरा पूरा गर्ने बताउँदै उनले भने, जनतालाई हामी झुक्याउन चाहन्नौँ, जे बोल्छौँ त्यही गर्छौ ।’