नवलपुरको अरुणखोला बहुमुखी क्याम्पसमा गोला तानेर स्ववियुमा भागबन्डा

नवलपुर न्युज

२०७९ फागुन ३०, मंगलबार प्रकाशित (१ साल अघि) २०९१ पाठक संख्या

नारायण शर्मा 

कावासोती । पूर्वी नवलपरासीको अरुणखोलास्थित अरुणखोला बहुमुखी क्याम्पसमा स्वतन्त्र विद्यार्थी युनियनको निर्वाचनअन्तर्गत विद्यार्थी नेताहरुले गोला तानेर पद भागबन्डा गरेका छन् ।

मतदानमा कुनै एउटा पक्षको स्पष्ट बहुमत नआउने हिसाब निस्किएपछि सहमतिका आधारमा यहाँका ४ विद्यार्थी संगठनका नेताले गोला थुतेर भागबन्डा गरेका हुन् ।

क्याम्पस प्रमुख ऋषिराम पाण्डेका अनुसार विद्यार्थी संगठनले आपसी छलफल गरेर गोला तानेर सहमति गरेका हुन् । पाण्डेका अनुसार स्ववियु सभापतिमा नेकपा ( समाजवादी) ले स्ववियु सभापतिसहित २ सदस्य पाएको छ । त्यसैगरी एमाले निकट अनेरास्ववियुले उपसभापति, सहसचिवसहित दुई सदस्य पाएको छ ।

कांग्रेस निकट नेविसंघले सचिवसहित दुई सदस्य पाएको छ । माओवादी निकट अखिल क्रान्तिकारीले भने कोषाध्यक्षसहित २ सदस्य पाएको छ । त्यहाँ मंगलबार विद्यार्थीहरुले सहमति गरेर गोला थुतेको विद्यार्थी नेता तीर्थ डुम्रेले जानकारी दिए । गोला तान्दा परेको पदसहित थप दुईरदुई सदस्य लिएर सहमति गरेका हुन् ।

३ सय ११ विद्यार्थी अध्ययनरत रहेको यस क्याम्पसमा स्नातक तहसम्म पढाइ हुन्छ । गोला तान्दा परेको पदसहित ती विद्यार्थी संगठनले स्ववियु निर्वाचन निर्विरोध घोषणा गराउन क्याम्पस प्रमुखलाई संयुक्त निवेदन दिएका छन् ।