कांग्रेसका जनप्रतिनिधिले काम गर्नै सकेनन् : नेता घिमिरे

नवलपुर न्युज

२०८० भाद्र २१, बिहिबार प्रकाशित (१ साल अघि) ५१८ पाठक संख्या

नारायण शर्मा

पूर्वीनवलपरासी — नेपाली कांग्रेसका नेता गुरुराज घिमिरेले कांग्रेसबाट स्थानीय तहमा नेतृत्व गरेका जनप्रतिनिधिहरुले काम गर्नै नसकेको टिप्पणी गरेका छन् ।

पूर्वीनवलपरासीको देवचुली नगरपालिकाद्वारा बिहीबार दलदलेमा आयोजित पार्टी कार्यकर्ता भेलामा बोल्दै कांग्रेसबाट जितेका ३ सयभन्दा बढी मेयर र पालिका अध्यक्षहरुको क्षमतामाथि प्रश्न उठाएका हुन् ।

बालेन साहले सकारात्मक र उर्जाशील काम गरेर देशभर सकारात्मक सन्देश दिएका बेला नेपाली कांग्रेसबाट जितेका ३ सयभन्दा बढी मेयर र गाउँपालिका अध्यक्षले आ-आफ्नो ठाउँबाट राम्रो काम किन गर्न सक्नुभएन , उनले मेयरहरुलाई प्रश्न गर्दै भने, राम्रो काम गरे पार्टीको छवि नै राम्रो हुन्छ ।

घिमिरेले कांग्रेसले देशभरका स्थानीय तहमा वर्चश्व रहेको स्मरण गराउँदै मेयरहरुले आफ्नो स्वार्थलाई तिलाञ्जली दिएर पार्टी, लोकतन्त्र र देशको स्वार्थमा काम गर्न आग्रहसमेत गरे ।

देश बनाउन वडाध्यक्षदेखि राष्ट्रपतिसम्मका सबै जनप्रतिनिधिले राष्ट्रिय स्वार्थ र जनतालाई हेरेर काम गर्नुपर्ने उनको जोड थियो । पार्टीले पनि सधैं योग्य मान्छेलाई अवसर दिनुपर्ने उनको भनाई छ ।