विद्यालयमा बालबालिकालाई दुनाटपरी बनाउन सिकाइँदै

नवलपुर न्युज

२०८० भाद्र २२, शुक्रबार प्रकाशित (१ साल अघि) १२६२ पाठक संख्या

कावासोती । नवलपुरको मध्यबिन्दु नगरपालिका वडा नम्बर १० अरुणखोला स्थित श्री नारायणी ईग्लिश बोर्डिङ स्कुलका विद्यार्थीहरु दुनाटपरी बनाउन सिक्न थालेका छन् ।

विद्यालयमा अध्यनरत विद्यार्थीहरुले शुक्रबार बुक फ्रि डे कार्यक्रम अनुसार कक्षा ६,७,८ र ९ सम्मका विद्यार्थीहरु दुना टपरी बनाउने सिप सिक्न थालेका हुन् ।

आधुनिकताका नाममा परम्परागत दुनाटपरी बनाउने, बत्ती कात्ने चलन हराउँदै गएको अवस्थामा नारायणी विद्यालयले प्रयोगात्मकसँगै व्यवहारिक ज्ञान, सीप सिकाउने अभियान थालेको छ ।

कक्षाकोठाभित्र पढाइने सैद्धान्तिक ज्ञानले मात्रै सिकाइ पूर्ण हुन नसक्ने वास्तविकतालाई आत्मसात् गर्दै यस बिधालयले विद्यार्थीमा व्यवहारिक ज्ञान, सीप सिकाउने उद्देश्यका साथ परम्परागतरूपमा चलनचल्तीका सीप सिकाउने कार्य गरिरहेको छ । यहाँ गाउँघर, समाजमा प्रयोगमा आउने दुनाटपरी, खेत रोप्ने र बत्ती तयार पार्ने जस्ता सीप सिकाउन थालिएको हो।

विद्यालयका बालबालिकालाई ब्यवहारिक शिक्षा दिने भन्दै दुना टपरी बनाउन सिकाएको नारायणी ईग्लिश बोर्डिङ स्कुलका प्रधानाध्यापक कृष्णप्रसाद आचार्यले बताउनुभयो ।

प्रधानाध्यापक आचार्यका अनुसार बालबालिकालाई किताबी ज्ञानसँगै हाम्रो समाजमा हुनेगरेका विभिन्न प्रकारका ब्यवहारिक शिक्षा समेत प्रदान गर्नुपर्छ भन्ने उद्देश्यका साथ बालिबालिकालाई जिवन उपयोगी शिक्षा प्रदान गरिएको उहाँको भनाई छ ।

विद्यालयको प्राङ्गणमा भएको दुनाटपरी कार्यक्रमको दृश्यले शिक्षक, अभिभावक, विद्यार्थीमा नयाँ कुरा सिक्ने र सिकाउने कार्यमा उत्साह थपिएको छ । बढ्दो आधुनिकताले गर्दा गाउँघरमा सबैले पुराना कुरा बिर्सिँदै गएको अवस्थामा विद्यालयमा सीप सिक्न पाउने र आफ्नो रितिरिवाज, चालचलन र सस्कृती जगेर्ना र संरक्षण गर्न अवसर मिलेको विद्यालयका छात्राहरुले बताए ।

अहिलेलाई बिद्यालयले दुनाटपरी बुन्ने, बत्ती कात्ने , खेत रोप्ने  जस्ता सीप सिकाएको छ । विस्तारै समयनुसार विभिन्न सीप सिकाएर बिद्यार्थीहरुलाई दक्ष बनाउने विद्यालयका प्रबन्ध निर्देशक इन्जिनियर सुशील आचार्यले जानकारी गराउनु भयो । यसैगरि विद्यालयले बेलाबेलामा विद्यार्थीलाई जिवन उपयोगि शिक्षा प्रदान गर्ने उद्देश्यकासाथ काम गरिरहेको उहाँको भनाइ छ।