मध्यविन्दुमा ट्याक्टरबाट खसेर ६० वर्षीय वृद्धको मृत्यु

नवलपुर न्युज

२०८१ मंसिर १, शनिबार प्रकाशित (५ दिन अघि) ७१७ पाठक संख्या

कावासोती । नवलपुरको मध्यविन्दुमा ६० वर्षीय वृद्ध ट्याक्टरबाट खसेर मृत्यु भएको छ । मध्यविन्दु नगरपालिका वडा नं: ३, इटौरा निवासी ६० वर्षीय देवीराम महतोको मृत्यु भएको हो ।

जिल्ला प्रहरी कार्यालय नवलपुरका प्रहरी नायब उपरीक्षक जेशी शाहका अनुसार, शुक्रवार साँझ ७ बजे महतो घरनजिकैको खेतमा पराल लोड गर्दै थिए । लु ४ त ८९४३ नम्बरको ट्याक्टरबाट अचानक खस्न जाँदा उनी घाइते भएका थिए ।

घाइते महतोलाई उपचारका लागी तत्काल मध्यबिन्दु जिल्ला अस्पताल डण्डा ल्याइएको थियो तर उपचारको क्रममा चिकित्सकले उनलाई ८:२२ बजे मृत घोषित गरेका थिए।

घटनाको जानकारी प्राप्त भएपछि जिल्ला प्रहरी कार्यालय नवलपुरको टोली घटनास्थलमा पुगेको छ र थप अनुसन्धान जारी रहेको प्रहरीले जनाएको छ ।