अग्यौली खानेपानी संस्था गण्डकी प्रदेशकै उत्कृष्ट घोषित

नवलपुर न्युज

२०८१ मंसिर ६, बिहिबार प्रकाशित (८ घण्टा अघि) ७६ पाठक संख्या

कावासोती – कावासोती नगरपालिका – १६ स्थित अग्यौली खानेपानी तथा सरसफाई उपभोक्ता संस्था गण्डकी प्रदेशकै उत्कृष्ट संस्था घोषित भएको छ ।

खानेपानी तथा ढल व्यवस्थापन विभागको ५३औं स्थापना दिवसको अवसरमा देशभरका सात उत्कृष्ट खानेपानी संस्थाको घोषणा गरिएको थियो, जसमा गण्डकी प्रदेशबाट अग्यौली खानेपानी संस्थाले सर्वोत्कृष्ट स्थान प्राप्त गरेको हो।

२०६४ सालमा स्थापना भएको उक्त संस्थाले २४ घण्टा स्वच्छ र सुलभ खानेपानी वितरण गर्ने प्रतिबद्धता पुरा गर्दै विभिन्न मापदण्डमा उत्कृष्टता प्राप्त गरेको हो। संस्थाका सचिव अर्जुन चालिसेका अनुसार, पानीको व्यवस्थापन र स्वच्छताको क्षेत्रमा उच्च मापदण्ड पुरा गर्न संस्थाले लगातार प्रयास गरेको छ।

संस्थाले आफ्नो दीर्घकालीन योजना तयार गरेको जानकारी दिँदै बुधबार आयोजित पत्रकार सम्मेलनमा पानीको स्वच्छता र व्यवस्थापनमा यसले महत्त्वपूर्ण कदम चालेको उल्लेख थियोे । हाल संस्थामा ३ हजार उपभोक्ता रहेका छन्, जसमा ५ युनिटसम्मको पानी पूर्णतस् निःशुल्क वितरण गरिन्छ।

संस्थाका कार्यवाहक अध्यक्ष गोपल सिर्पालीले जानकारी दिँदै भने, हामी कावासोती नगरपालिकाका वडा नं १४, १५, १६ र १७ मा नियमित पानी आपूर्ति गर्दै आएका छौं। अग्यौली खानेपानी संस्था गण्डकी प्रदेशका ११ जिल्लाहरू मध्ये उत्कृष्ट घोषित भएको यो सम्मानले संस्था र यहाँका उपभोक्ताहरूको जीवनस्तरमा थप सुधार ल्याउने विश्वास गरिएको छ ।