कावासोती सदरमुकाम निर्माणका लागि रुख काट्न मन्त्री परिषदको स्वीकृति

नवलपुर न्युज

२०८१ पौष १०, बुधबार प्रकाशित (३ महिना अघि) ६७४ पाठक संख्या

कावासोती । नवलपुरको कावासोती – ३ मा बन्ने भनिएको नमूना सदरमुकाम निर्माण स्थलमा ६४२ वटा ठूला रुख काट्न मन्त्री परिषदले स्वीकृति प्रदान गरेको छ ।

मंगलबार साँझ बसेको मन्त्री परिषदको बैठकले नमूना सदरमुकाम निर्माण स्थलमा रहेका रुखहरू काट्न स्वीकृति दिएको हो।

नवलपुरका क्षेत्र नं: २ का प्रतिनिधिसभा सदस्य विष्णुकुमार कार्कीले हिजोको मन्त्री परिषदको बैठकले रुख हटाउन अनुमति दिएको बताए, जसको कारण अब नमूना सदरमुकाम निर्माणको काम सुरु हुने छ।

भवन निर्माणको जिम्मा पाएको रौतहटको चौधरी कन्स्ट्रक्सनको टोली भवन निर्माणस्थलमा आइपुगे पनि रुख कटानको आदेश नआउँदा निर्माण कार्य सुरु गर्न सकेका थिएनन्। “रुख कटान गर्न मन्त्री परिषदको बैठकले स्वीकृति दिएको छ, अब निर्माणको काममा ढिलाइ हुँदैन, “सांसद कार्कीले भने।

कावासोती नगरपालिका -३ मा रहेको ज्योतिकुञ्ज सामुदायिक वनभित्रको १८६ बिघा जग्गामा नमूना सदरमुकाम निर्माणका लागि काम थालिएको हो। पहिलो चरणमा जिल्ला प्रशासन कार्यालय, जिल्ला समन्वय समिति, कोष तथा लेखा नियन्त्रण कार्यालयलगायतका पाँचवटा कार्यालय सर्ने गरी तीनवटा भवन निर्माणको ठेक्का लागेको छ।

नमुना सदरमुकाम निर्माणका लागि चालु आर्थिक वर्षमा विनियोजन गरिएको २० करोड, अर्थमन्त्रालयले थप गरी सुनिश्चित गरेको ५० करोड र आगामी आर्थिक वर्षका लागि विनियोजन गरिएको ८० करोड रुपैयाँबाट भवन निर्माणको काम अघि बढाउने गरी सघन शहरी तथा भवन निर्माण आयोजनाले काम सुरु गरेको हो।