आठौं नवलपुर महोत्सवको तयारी तीव्र, खुल्ला नृत्य प्रतियोगिता आयोजित हुने

नवलपुर न्युज

२०८१ माघ १८, शुक्रबार प्रकाशित (२ घण्टा अघि) १५७ पाठक संख्या

कावासोती । आठौं नवलपुर महोत्सव–२०८१ को तयारी तीव्र रूपमा अघि बढेको छ। महोत्सवको मुख्य आकर्षण बन्ने नवलपुर जिल्ला स्तरीय खुल्ला नृत्य प्रतियोगिता आगामी माघ २५ गतेदेखि फागुन १० गतेसम्म सञ्चालन हुने निश्चित भएको छ। नवलपुर डान्स आईडलको रूपमा परिचित रहेकाले यस वर्षको प्रतियोगिता नवलपुर जिल्ला स्तरीय खुल्ला नृत्य प्रतियोगिताको रूपमा नामकरण गरिएको हो।

नवलपुर जिल्ला भित्र रहेका नव प्रतिभाहरूलाई प्रोत्साहन र आफ्नो कला प्रदर्शनको अवसर प्रदान गर्न नृत्य प्रतियोगिता आयोजना गर्न लागिएको छ । प्रतियोगिता महोत्सवको दौरान सम्पूर्ण दर्शक र सहभागीहरूलाई मनोरञ्जनका साथै स्थानिय कला र सांस्कृतिक महत्वको प्रवद्धन गर्नका लागि पनि विशेष योजना बनाइएको छ।

नवलपुर जिल्ला स्तरीय खुल्ला नृत्य प्रतियोगिता–२०८१ को आयोजनामा सबै इच्छुक प्रतियोगीलाई माघ २० गते भित्र नवलपुर उद्योग बाणिज्य संघको कार्यालयमा नाम दर्ता गर्न आग्रह गरिएको छ । प्रतियोगिता २२ गतेदेखि टप टेन छनौट गरेर महोत्सवभर प्रतियोगीहरूको प्रस्तुति हुनेछ।

उप समिति संयोजक प्रेम पाण्डेले, “प्रतिभाहरूको सृजनात्मकता र कला प्रदर्शित गर्नको लागि यो एक राम्रो अवसर हो, र महोत्सवका अन्य कार्यक्रमसँगै यो नृत्य प्रतियोगिता नवलपुरको सांस्कृतिक धरोहरलाई अझ प्रगाढ बनाउनका लागि महत्वपूर्ण साबित हुनेछ,” उनले भने।

नवलपुर महोत्सवका अन्य कार्यक्रमहरूको तयारी पनि तीव्र गतिमा भइरहेको छ र यस महोत्सवमा स्थानीय उत्पादनहरूको प्रवर्धन, कला र भाषाको संरक्षण र सृजनात्मकता प्रकट गर्ने अवसर समेत प्रदान गरिने बताइएको छ।