नवलपुर महोत्सव फागुन १७ गतेसम्म लम्बियो

नवलपुर न्युज

२०८१ फागुन १०, शनिबार प्रकाशित (२ हफ्ता अघि) ६७० पाठक संख्या

कावासोती – कावासोती – १६, डण्डामा माघ २५ गतेदेखि सुरु भएको आठौं नवलपुर महोत्सव फागुन १७ गतेसम्म लम्बिएको छ।

यसअघि फागुन १० गतेसम्म सञ्चालन हुने भनिएको महोत्सवको अवधि एक साताले थपिएको हो। नवलपुर उद्योग वाणिज्य संघका महासचिव सागर पोखरेलका अनुसार दर्शकको उल्लेखनीय सहभागिता देखिएकोले महोत्सवको अवधि बढाइएको हो।

महोत्सवमा हालसम्म करिब ५० हजार दर्शकले अवलोकन गरिसकेको आयोजकको दाबी छ। विशेष गरी महोत्सवमा राखिएको ‘फिस टनेल’ दर्शकमाझ लोकप्रिय बनेको छ ।  सोहि कारण महोत्सव लम्ब्याइएको संघका अध्यक्ष बैकुण्ठप्रसाद अर्यालले जानकारी दिनुभयो ।

राष्ट्रिय कलाकारहरूको सांगीतिक प्रस्तुति महोत्सवको मुख्य आकर्षणमध्ये एक बनेको छ। अहिलेसम्म बद्री पंगेनी, रचना रिमाल, एलिना चौहान, पशुपति शर्मा, रमेशराज भट्टराई, अर्जुन सापकोटा लगायतका कलाकारले प्रस्तुति दिइसकेका छन्। आयोजकका अनुसार शनिबार गायक दुर्गेश थापाले प्रस्तुति दिनेछन्।