नवलपुरमा आगलागीका घटना बढ्दो: एकैदिन दुई ठाउँमा भीषण क्षति

नवलपुर न्युज

२०८१ चैत्र २३, आईतबार प्रकाशित (१९ घण्टा अघि) ३७० पाठक संख्या

कावासोती । गर्मी बढेसँगै नवलपुरमा आगलागीका घटनाहरू बढ्न थालेका छन्। जिल्ला प्रहरी कार्यालय नवलपुरका अनुसार चैत्र महिनायता जिल्लामा १५ भन्दा बढी स्थानमा आगलागी भइसकेको छ । बन र घरमा दैनिकजसो आगलागी हुने क्रम बढिरहेको छ।

हिजो मात्रै कावासोती नगरपालिका क्षेत्रका दुई ठाउँमा आगलागीका घटनाहरू भएका छन्। दिउँसो साढे २ बजेतिर वडा नं: ११ कुंडौलीमा आगलागी भएको थियो। स्थानीय थनुराम थनेतको परालको टौवाबाट सुरु भएको आगोले निजको टिनले छाएको एकतले कच्ची घर समेत जलेर नष्ट भएको छ। आगलागीबाट विदेशबाट घर बनाउन ल्याइएको १० लाख नगदसहित करिब ५० लाख रुपैयाँ बराबरको क्षति भएको पीडित परिवारले जनाएको छ।

यसैगरी, कावासोती १७ गोछडामा पनि आगलागी भएको छ। स्थानीय ३० वर्षीया सोहाना चौधरीको जस्ताले बनेको एकतले घरमा आगलागी हुँदा फ्रिज, पंखा, ग्ल्याण्डर मिक्स्चर, झ्याल, लत्ता कपडा लगायत सामग्री जलेर करिब १ लाख ५० हजार रुपैयाँ बराबरको क्षति पुगेको प्रहरीको भनाइ छ । प्रहरी र स्थानीयवासीको सहयोगमा दुबै ठाउँको आगो अहिले पूर्ण रूपमा नियन्त्रणमा आएको प्रहरीले जनाएको छ ।