नवलपुरमा बाबुआमाकै कुटपिटबाट चार महिनाको शिशुको मृत्यु

नवलपुर न्युज

२०८२ बैशाख ९, मंगलबार प्रकाशित (३ घण्टा अघि) २९४ पाठक संख्या

कावासोती ।  नवलपको बौदीकाली गाउँपालिका – १ अर्मलेमा बाबुआमाले लछारपछार गर्दा चार महिने शिशुको मृत्यु भएको छ ।

स्थानीय दीपेन्द्र परियार र उनकी श्रीमती कमला परियारले गए राती मादक पदार्थ सेवन गरी चार महिने छोरा लाई लछारपछार गरी गम्भीर घाइते बनाएकोमा उपचारको क्रममा मृत्यु भएको जिल्ला प्रहरी कार्यालयका प्रहरी नायव उपरीक्षक मधु नेपालले बताउनुभयो ।

मादक पदार्थ सेवन गरेका बाबुआमाले शिशुलाई घरको बरन्डामा गम्भीर घाइते बनाई छाडेको अवस्थामा स्थानीले देखे पछि उपचारको लागि रामपुर अस्पताल पाल्पा लगिएकोमा उपचारको क्रममा शिशुको मृत्यु भएको प्रहरी नायव उपरीक्षक नेपालले जानकारी दिनुभयो । शिशुको हत्यामा संलग्न रहेका २१ वर्षीय बाबु दीपेन्द्र परियार र ३५ वर्षीय आमा कमला परियार अहिले प्रहरी नियन्त्रणमा रहेका छन् ।

आमा कमला परियार दीपेन्द्र परियार सँग केही वर्ष अघि दोस्रो विवाह गरी आएको स्थानीय सुक बहादुर नेपालीले बताउनु भयो । घटनाको थप अनुसन्धान भई रहेको प्रहरीले जनाएको छ ।