घरघरमै सामाजिक सुरक्षा भत्ता , मध्यबिन्दुका असक्त नागरिक खुसी

नवलपुर न्युज

२०७८ भाद्र १४, सोमबार प्रकाशित (३ साल अघि) २६३३ पाठक संख्या

कोल्हुवा । नवलपुरको मध्यबिन्दु नगरपालिका भित्रका अशक्तलाई घरदैलोमै पुगेर सामाजिक सुरक्षा भत्ता वितरण गरिएको छ ।

सिटिजन्स बैङ्क कोल्हुवा शाखाका प्रबन्धक हरि प्रसाद अधिकारीले बैंकसम्म आउन नसक्ने अशक्तलाई घरघरमै पुगेर भत्ता वितरण गर्नु भएको हो ।

प्रबन्धक अधिकारी सहितको टोलीले मध्यबिन्दु नगरपालिका वाड नं १,२,३ र ४ का असक्त नागरिकलाई घरघर मै पुगेर सामाजिक सुरक्षा भत्ता वितरण गर्नु भएको छ ।

बैंकसम्म आएर सामाजिक सुरक्षा भत्ता लिन नसक्नेलाई वडाको समन्वयमा बैंकले घरदैलोमै सामाजिक सुरक्षा भत्ता उपलब्ध गराउन थालेको वडा अध्यक्ष नारायण पौडेलले जानकारी दिनु भयो ।

आगामी दिनमा पनि अशक्त समूहका लक्षित वर्गलाई घरदैलोमै सेवा उपलब्ध गराउन व्यवस्था मिलाइने अध्यक्ष पौडेलको भनाई छ । नगरपालिकाले अशक्तलाई बैंक तथा वडाको समन्वयमा घरदैलोमै पुगेर सामाजिक सुरक्षा भत्ता दिँदै आएको छ ।

नागरिकको घरदैलोमा पुगेर सामाजिक सुरक्षा भत्ता घर मै पाए पछि वडा नम्बर २ कोल्हुवाका अशक्त ८० वर्षीया टेक बहादुर खत्रीले हिड्न नसक्नेलाई घर मै भत्ता ल्याइ दिँदा खुसी भएको बताउनु भयो।

उहाँ लगायत उक्त टोलका एक दर्जन बढी बृद्धाबृद्धलाई घरमा पुगेर बैङ्कले भत्ता वितरण गरेको थियो । सिटिजन्स बैङ्क कोल्हुवा शाखाका प्रबन्धक अधिकारी सहितको टोलीले करिब १०० घरधुरीलाई घरमै पुगेर चार महिनाको १२ हजार रुपैयाँ भत्ता उपलब्ध गराएको थियो ।