नवलपुर: कावासोतीको महेन्द्र राजमार्गमै बग्छ ढलको पानी

नवलपुर न्युज

२०७९ श्रावण १०, मंगलबार प्रकाशित (२ साल अघि) ६८३ पाठक संख्या

नारायण शर्मा,

पूर्वी नवलपरासीको सदरमुकाम कावासोती बजारमा ढल निकासको व्यवस्था नहुँदा महेन्द्र राजमार्गमै ढलको पानी बग्ने गरेको छ । घरघरबाट निस्केको फोहर पानी महेन्द्र राजमार्गमा बग्दा दुर्गन्ध बढेको छ ।

गत चैतदेखि यहाँको मुख्य बजार थाना चोक, सभापति चोक, फिलिमहल चोकमा ढलको पानी सोझै राजमार्गमा बग्ने गरेको छ । चैतमा राजमार्ग फराकिलो पार्ने चिनियाँ ठेकेदार कम्पनीले भत्काएको राजमार्गमा बिच्छयाइएको ह्युम पाइप निकालिदिएपछि ढल राजमार्गमा बग्ने गरेको हो । घरघरबाट निस्कने फोहर पानी बगाउने ह्युम पाइप निकालेपछि ढल सोझै राजमार्गमा बग्ने गरेको हो ।

भान्छा, बाथरुम र ट्वाइलेटको पानीसमेत सोझै राजमार्गमा बगाउने गर्दा पैदलयात्री नाक थुनेर हिँड्न बाध्य छन् । पाइप निकालिएको खाल्डा नपुरेका कारण ठूल्ठूला खाल्डामा पानी जमेर दुर्घटनाको जोखिम बढेको छ ।

सडक फराकिलो पार्न पाइप निकालिए पनि वर्षात्‌का कारण त्यहाँ ढल निर्माण हुन नसकेको सडक विभागले जानकारी दियो । महेन्द्र राजमार्गको उत्तरी भागमा पानी राजमार्गमै बग्ने गरेको छ । कावासोती नगरपालिकाका इन्जिनियर पवन रुपाखेतीले सडक विस्तारको जिम्मेवारी पाएको चिनियाँ ठेकेदार कम्पनीको लापर्बाहीका कारण घरघरबाट निस्कने पानीले निकास नपाउँदा समस्या भएको सुनाए ।

उक्त सडक निर्माणको जिम्मेवारी चाइना स्टेट इन्जिनियरिङ कर्पोरेसन लिमिटेडले पाएको छ । सडकको क्षेत्राधिकार भित्रको काम भएकाले मर्मतसम्भारको जिम्मेवारी पनि उसैको हुने रुपाखेती बताउँछन् ।

‘त्यसको अनुगमन गर्ने सरकारी निकायको चरम लापर्बाही हो‚’ स्थानीय गोपाल ढकाल भन्छन्‚ ‘यो सडकको अनुगमन निरीक्षण गर्ने निकाय के हेरेर बस्छन् रु राजमार्गमा ढल बग्न थालेको ५ महिना भैसक्योस वर्षात्‌मा झन् बिजोग भयो‚ कसैलाई वास्ता छैन ।’

राजमार्गमा खाल्डा भएको स्थानमा टायरको संकेत राखेर स्थानीयले पैदलयात्रीलाई सजग बनाएका छन् । सभापति चोक नजिकै राजमार्गका खाल्डाबारे थाहा दिन राजमार्गमा बसको टायर राखिएको छ । राजमार्गको उत्तरतर्फ सडकमै पानी बग्ने गरेकाले पैदलयात्री समस्यामा परेका छन् । बजारबाट मूल सडकमा निस्कन जुत्ता खोल्नुपर्ने अवस्था छ । पाइप निकालिएको स्थानमा पानी भरिएकाले दुर्घटनाको जोखिम बढ्दो छ ।

पुल र कल्भर्ट निर्माण भैरहेको स्थानमा बनाइएको डाइभर्सन सडक जोखिमपूर्ण भएकाले दुर्घटनाको जोखिम दिनहुँ बढ्दो छ । पानी परेको समयमा खाल्डामा पानी जमेर सडक नै नदेखिने अवस्था छ ।