सभ्य र सुरक्षित तवरले होली पर्व मनाउन नवलपुर प्रहरीको आग्रह

नवलपुर न्युज

२०७९ फागुन २१, आईतबार प्रकाशित (१ साल अघि) ८५१ पाठक संख्या

कावासोती । प्रहरीले होलीको नाममा उच्छृङ्खल क्रियाकलाप नगर्न आग्रह गरेको छ । आउँदै गरेको फागु अर्थात् होलीलाई सभ्य, शिष्ट, स्वस्थकर र मर्यादित बनाउन प्रहरीले आग्रह गरेको छ। जिल्ला प्रहरी कार्यालय नवलपुरले सभ्य एवम् सुरक्षित तवरले होली पर्व मनाउन सबैसँग अनुरोध गरेको हो ।

प्रहरीले आत्मीयरूपमा नजिक भएका व्यक्ति वा आफन्तसँग मात्र होली खेल्न, होली पर्वको नाममा उच्छृङ्खल क्रियाकलाप नगर्न आग्रह गरेको छ । कसैको इच्छाविपरीत रङ, लोला मोबिल, मोसो, केमिकल र फोहरपानी प्रयोग गरेमा कानुनबमोजिम कारबाही गर्ने जिल्ला प्रहरी कार्यालय नवलपुरका प्रहरी उपरीक्षक भुवनेश्वर तिवारीले चेतावनी दिनुभयो। यस्तै महँगा गरगहना लगाएर होली नखेल्न, ट्राफिक नियमको पूर्ण पालना गर्न, जाँडरक्सी खाएर गाडी नचलाउन, अशक्त, महिला, बालबालिका, ज्येष्ठ नागरिक तथा पर्यटकलाई कुनै पनि प्रकारको दुव्र्यवहार नगर्न पनि प्रहरी उपरीक्षक तिवारीले आग्रह गर्नुभयो ।

रेलिङ नभएको छत तथा सडकमा होली नखेल्न, भिडभाड हुने ठाउँमा होली नखेल्न, कुनै पनि आपराधिक गतिविधि हुन लागेको वा भएको थाहा भएमा तत्काल नेपाल प्रहरीको हटलाइन नं १०० मा खबर गर्न प्रहरीले अनुरोध गरेको छ। यसवर्ष भोलि सोमबार हिमाली र पहाडी जिल्लामा तथा मंगललबार तराईका जिल्लामा होली पर्व मनाइँदैछ ।