देवचुलीमा ट्रक दुर्घटना: पैदल यात्री गम्भीर घाइते

नवलपुर न्युज

२०८१ श्रावण २९, मंगलबार प्रकाशित (५ महिना अघि) १०७६ पाठक संख्या

देवचुली । देवचुली नगरपालिका – २ सिजी पार्क अगाडी पूर्व-पश्चिम राजमार्गमा एक दर्दनाक दुर्घटना भएको छ ।

पश्चिमबाट पूर्वतर्फ आउँदै गरेको सु.प.०१-००१ ख २८३५ नम्बरको ट्रकको टायरबाट अकस्मात ढुङ्गा उछिट्टिँदा पैदल यात्री रिता सुवेदी गम्भीर घाइते भएकी छिन् ।

सोही वडा बस्ने ३३ वर्षीया सुवेदीको टाउकोमा चोट लागेको छ र उनलाई तत्काल उपचारका लागि पुरानो मेडिकल कलेज भरतपुर चितवन पठाइएको जिल्ला प्रहरी कार्यालय नवलपुरले जनाएको छ । उनको अवस्था गम्भीर रहेको छ ।

ट्रक चालक बैतडी निवासी ३६ वर्षीय रामदत्त पन्तलाई प्रहरीले नियन्त्रणमा लिएको छ । ट्रकलाई पनि इप्रका रजहरको नियन्त्रणमा राखिएको छ । सो दुर्घटना हिजो साँझ ६:३० बजे भएको थियो । प्रहरीका अनुसार घटनाको थप अनुसन्धान भइरहेको छ  ।