नवलपुरमा दशैं लक्षित यात्रु सहायता कक्ष स्थापना

नवलपुर न्युज

२०८१ आश्विन १७, बिहिबार प्रकाशित (१ महिना अघि) ५०७ पाठक संख्या

कावासोती । नवलपुरमा दशैंको बेला यात्रुहरूको सुरक्षा र सुविधा सुनिश्चित गर्न चार स्थानमा यात्रु सहायता कक्ष स्थापना गरिएको छ।

जिल्ला ट्राफिक प्रहरी कार्यालय नवलपुरका प्रहरी निरीक्षक जनकराज बन्जाराले बताए अनुसार, कावासोती, दलदले, गैँडाकोट, र त्रिवेणीमा सहायता कक्ष स्थापना गरिएको हो । थप दुई स्थानमा पनि सहायता कक्ष स्थापना गरिने योजना छ ।

यात्रु सहायता कक्षको उद्देश्य यात्रुहरूमा हुन सक्ने दुव्र्यवहार, बढी भाडा असुली, र क्षमता भन्दा बढी यात्रु राखेर दुर्घटनाको जोखिमलाई न्यूनिकरण गर्नु हो ।

कावासोतीमा आयोजित कार्यक्रममा जिल्ला प्रहरी कार्यालय नवलपुरका प्रहरी उपरीक्षक यादव ढकालले सहायता कक्षको उद्घाटन गर्नुभयो। उहाँले सहायता कक्षलाई प्रभावकारी रुपमा संचालन गर्ने प्रतिबद्धता व्यक्त गर्नुभयो ।

साथै, लामो दूरीका सवारीका चालकहरूको थकान कम गर्न रिफ्रेस सेन्टर पनि सञ्चालनमा ल्याइएको छ । राति ११ बजेदेखि कावासोती आउने सवारीलाई रोकेर चालकलाई आरामको व्यवस्था गरिनेछ ।