राइनो कप फुटबल : भोली इण्डिया र सप्तरीबीच प्रतिस्पर्धा

नवलपुर न्युज

२०८१ कार्तिक ९, शुक्रबार प्रकाशित (४ दिन अघि) २४५ पाठक संख्या

कोल्हुवा । राइनो कप फुटबलको ७औं संस्करणमा भोलि (शनिवार) दुई ठुला टिम , भारतको एलेभेन स्टार ईण्डिया र नमोबुद्ध क्लब सप्तरीबीच प्रतिस्पर्धा हुँदैछ ।

चित्लाङ फुटबल क्लबलाई सडन डेथमा पराजित गर्दै क्वाटर फाइनलमा प्रवेश गरेको सप्तरीको नमोबुद्ध क्लबले पहिलोपटक मणिपुरबाट आएको एलेभेन स्टार ईण्डियासँग खेल्नेछ ।

खेल कोल्हुवा राइनो रङ्गशालामा दिउँसो ३:०० बजे सुरु हुनेछ । भारतीय टिमको आगमनले दर्शकमा उत्साह थपेको छ, र यो खेल हेर्नका लागि धेरै दर्शकहरू उपस्थित हुने अपेक्षा गरिएको छ । एलेभेन स्टार ईण्डिया, जुन मणिपुरबाट आएको हो, नेपाली फुटबल प्रेमीहरूका लागी एक नयाँ अनुभव हुनेछ ।

प्रतियोगितामा १२ टिम सहभागी छन्, खेलको विजेताले ८ लाख र उपविजेताले ४ लाख नगद पाउनेछ । आयोजक संस्था राइनो क्लबका अध्यक्ष दोमन बहादुर भण्डारीले खेलकुद विकास र जैविक विविधताको संरक्षणको उद्देश्यका लागि प्रतियोगिता आयोजना गरिएको जानकारी दिए ।

यस प्रतियोगिताबाट गैँडाको संरक्षणको सन्देश फैलाउने लक्ष्य राखिएको छ, जसले खेलकुद र पर्यावरण संरक्षणलाई एकसाथ जोड्ने प्रयास गरिएको छ । दर्शकहरूको आकर्षण र प्रतिस्पर्धी खेल देख्न पाउने अवसरको लागि टिम इण्डियाको उपस्थिति विशेष महत्व राख्दछ ।

त्यस्तै , आज शुक्रबार भएको खेलमा नेपाल सशस्त्र प्रहरी क्लब विजयी भएको छ । नेपाल सशस्त्र प्रहरी क्लबले नमुना युवा क्लब कावासोतीलाई ३ – ० गोलको अन्तरले पराजित गरेको हो ।