बिपना चौधरीको खोजी कार्य जारी: पिकनिकबाट फर्कने क्रममा बेपत्ता

नवलपुर न्युज

२०८१ कार्तिक १४, बुधबार प्रकाशित (३ हफ्ता अघि) ४८५५ पाठक संख्या

कोल्हुवा । कुमारवर्ती माध्यमिक विद्यालय, कोल्हुवाकी १९ वर्षीय छात्रा बिपना चौधरी पिकनिक गएर फर्कने क्रममा बेपत्ता भएकी छन्।

उनी तनहुँको बन्दीपुरबाट पिकनिकमा गएर फर्कंदा, गत सोमबार इच्छाकामना गाउँपालिकामा बसमा यात्रा गर्दै गर्दा छोटो शौच गर्न जानका लागी ओर्लिएकी थिइन्। त्यतिबेला सडक जाम भएको थियो । शौच गर्न गएकी बिपना नफर्किएपछि खोजी कार्य सुरु गरिएको हो।

बेपत्ता भएको घटनाको जानकारी पाउँदै विद्यालय व्यवस्थापन समितिका अध्यक्ष टेक प्रसाद पोखरेल सहितको टोली खोजी कार्यमा लागेको थियो । सोही क्रममा आज बुधबार पनि बिहानदेखि निरन्तर खोजी कार्य जारी राखिएको छ । बिपनाको खोजीका लागि विद्यालयका शिक्षक र विद्यार्थी, परिवारका सदस्य र प्रहरीको संयुक्त टोलीले विभिन्न स्थानमा खोजी गरिरहेका छन्।

अध्यक्ष पोखरेलले भने, “हामीले इच्छाकामना गाउँपालिकाबाट केराबारीसम्म खोजी गरिसकेका छौं र भोली बिहान शिवघाटसम्म खोज्ने योजना बनाएका छौं।” बिपना कक्षा १२ मा अध्ययनरत थिइन् । उनीका परिवारजनले पनि यस घटनामा चिन्ता व्यक्त गरेका छन् । बिपनाको खोजी कार्यमा सबै पक्षले मिलेर प्रयास गरिरहेका छन् ।