नवलपुरमा ट्याक्टर दुर्घटना, चार जना घाइते

नवलपुर न्युज

२०८१ मंसिर १, शनिबार प्रकाशित (४ दिन अघि) ७२३ पाठक संख्या

कावासोती । नवलपुरको हुप्सेकोटमा शनिबार अपराह्न एक ट्याक्टर दुर्घटना हुँदा चार जना घाइते भएका छन्। दुर्घटना हुप्सेकोट -४ स्थित चुहाडे गाउँको भित्रि सडक खण्डमा भएको हो।

जिल्ला प्रहरी कार्यालय नवलपुरका अनुसार, दिउँसो साढे तीन बजेतिर ट्याक्टर चालकले खेतमा पराल लोड गर्नका लागि हुप्सेकोट – ४ चुहाडेबाट यात्रा गर्दै थिए। अचानक चालकले ट्याक्टरको नियन्त्रण गुमाउँदा उक्त सवारी सडकदेखि १५ मिटर तल खस्दा चालकसहित चार जना घाइते भएका छन्।

घाइते हुनेमा ट्याक्टर चालक कावासोती- १६ डण्डा निवासी ४३ वर्षीय हरि प्रसाद राना, हुप्सेकोट – ४ शंखदेवका २४ वर्षीय निरज भण्डारी, सोही स्थानका २४ वर्षीय सन्दिप पाठक र २१ वर्षीय सुदिप सापकोट रहेका छन्।

प्रहरीका अनुसार, घाइते सबैको अवस्था सामान्य छ र उनीहरूलाई उपचारका लागि जिल्ला अस्पताल डण्डामा ल्याइएको छ । घटनाका बारेमा थप अनुसन्धान भइरहेको प्रहरीले जानकारी दिएको छ ।