नवलपुरमा ट्रयाक्टर दुर्घटना, १२ जना घाइते

नवलपुर न्युज

२०८१ मंसिर १५, शनिबार प्रकाशित (५ घण्टा अघि) ३२० पाठक संख्या

कावासोती । नवलपुरको गैँडाकोट नगरपालिका वडा नं: १४ मा शुक्रबार साँझ ट्र्याकर दुर्घटनामा परी १२ जना घाइते भएका छन्।

जिल्ला प्रहरीले जानकारी दिएको अनुसार, साँझ ७:३० बजेको समयमा गैँडाकोट १४ हात्तिसारबाट भेडाबारी तर्फ आउँदै गरेको ना ५ त ७०९ नम्बरको ट्र्याकर सडकबाट १५ मिटर तल खस्दा दुर्घटना भएको हो।

घाइते हुनेमा गैँडाकोट – ११ की मनमाया सिंजाली, फत्तेबहादुर सुनारी, क्षेमाया सिंजाली मगर, गैँडाकोट – १० पितौजिका कर्मासिंह सारु मगर, गैँडाकोट – १२ मालपुरका संगिता आले, उदिमाया सारु, गौमाया आले, शान्तमाया सुनारी, धनकुमारी थनेत, गैँडाकोट – १४ भागरका यम बहादुर बाँचे मगर, हुप्सेकोट झ्यालबासकी भविशरा सोमै र आईती केरुङ रहेका छन्।

घाइतेमध्ये १० जनालाई नयाँ मेडिकल कलेज र अन्य २ जनालाई एलाईभ हस्पिटल, भरतपुरमा उपचार भइरहेको छ। प्रहरीले घटनाका बारेमा थप अनुसन्धान गरिरहेको जनाएको छ।