मध्यविन्दु नगरपालिकाका प्रमुख प्रशासकीय अधिकृत रमेश घर्तीको सरुवा

नवलपुर न्युज

२०८१ मंसिर १६, आईतबार प्रकाशित (३ दिन अघि) १५७ पाठक संख्या

चोरमारा । मध्यविन्दु नगरपालिकाका प्रमुख प्रशासकीय अधिकृत रमेश घर्तीको सरुवा भएको छ । आइतबार उहाँलाई विदा गरिनुका साथै एक विदाई कार्यक्रम पनि आयोजना गरिएको हो । अब घर्ती लमजुङको सुन्दरबजार नगरपालिका जान लाग्नुभएको छ ।

प्रशासकीय अधिकृत रमेश घर्तीलाई नगरपालिका परिवारले उहाँको कार्यकालको क्रममा पुर्याउनु भएका योगदानको उच्च मुल्यांकन गरेको छ । नीतिगत सुधार र प्रशासनिक व्यवस्थापनमा उहाँले दिएको योगदान विशेष गरी उल्लेखनीय रहेको छ, र नगरपालिकाको सामग्र व्यवस्थापकीय भूमिकामा उहाँको कामलाई नगरवासीहरू सदैव सम्झिरहनेछन्।

नगर प्रमुख भिमलाल अधिकारीले “फेरी भेटौंला” कार्यक्रममा रमेश घर्तीलाई सम्मान गर्दै मायाको चिनो प्रदान गर्नुभयो। उहाँले घर्तीको निजामती जीवन र व्यक्तिगत जीवन अझै थप सफल र सार्थक बन्न सकोस् भन्ने शुभकामना व्यक्त गर्नुभयो।

त्यसैगरी, प्रमुख प्रशासकीय अधिकृत रमेश घर्तीले “फेरी भेटौंला” कार्यक्रममा आफुलाई कुनै पनि असर नपर्ने तरिकाले सबैले निर्देशन बमोजिम नै काम गरेको भन्दै कर्मचारी र नगरवासीलाई धन्यवाद ज्ञापन गर्नुभएको थियो ।

मध्यविन्दु नगरपालिका प्रमुख प्रशासकीय अधिकृत घर्तीको विदाइपछि सोमबार शिशिर पौडेल, सुन्दरबजार नगरपालिका लमजुङका प्रमुख प्रशासकीय अधिकृतका रूपमा नयाँ जिम्मेवारी सम्हाल्न आउनुहुनेछ।