देवचुलीका ४६ जना विद्यार्थीलाई शैक्षिक सामाग्री वितरण

नवलपुर न्युज

२०८१ पौष १२, शुक्रबार प्रकाशित (३ महिना अघि) ३१५ पाठक संख्या

कावासोती । नवलपुरको देवचुली नगरपालिका वडा नम्बर १६ , बेलस्वाराका ४६ जना विद्यार्थीलाई शैक्षिक सामाग्री वितरण गरिएको छ।

जागृति बाल तथा युवा सरोकार नेपालले नेपाल हिल्फे बिटिकम किन्डर इन चिल्ड्रेन नेपालको सहयोग र देवचुली नगरपालिका वडा नम्बर १६ को समन्वयमा श्री सरस्वती आधारभूत विद्यालयमा अध्ययनरत विद्यार्थीलाई सो सामाग्री वितरण गरेको हो।

देवचुली नगरपालिकामा संचालित आयआर्जन कार्यक्रम अन्तर्गत ‘ खुसी खुसी विद्यालयमा बालबालिका पुर्याउने’ अभियान अन्तर्गत शैक्षिक सामाग्री हस्तान्तरण गरिएको जागृति बाल तथा युवा सरोकार नेपालका महासचिव दिपक शर्माले बताउनुभयो।

सो विद्यालयमा अध्ययनरत ४६ जना छात्र/छात्रालाई झोला, स्विटर, टोपी, कपी, पेन्सिल लगायतका सामाग्री वितरण गरिएको हो। जागृति बाल तथा युवा सरोकार नेपालले किशोरकिशोरी र आयआर्जनको क्षेत्रमा गर्दै आएको काममा धन्यवाद व्यक्त गर्दै नगरले पनि बालबालिकाको चौतर्फी विकासका लागि विभिन्न योजना निर्माण गरेको जानकारी देवचुली नगरपालिका नगर प्रमुख हरि प्रसाद न्यौपानेले दिनुभयो।

शैक्षिक सामाग्री वितरण कार्यक्रममा नगर उप प्रमुख पार्वता तिवारीले संस्थाले गरेको कार्यको सराहना गर्दै समग्र बालबालिकाको लागि निरन्तर लागिरहने प्रतिबद्धता जनाउनुभयो। उहाँले बालबालिकाको विकासका लागि स्थानीय सरकारसँगै अन्य सरोकारवालाले पनि ध्यान दिन आवश्यक रहेको बताउनुभयो।

यस कार्यक्रममा देवचुली नगरपालिकाका जनप्रतिनिधिहरु, अभिभावकहरु, विद्यालय व्यवस्थापन समितिका पदाधिकारीहरु, शिक्षक र विद्यार्थीहरुको उपस्थिति थियो।