नवलपुरको दुर्गम क्षेत्रमा नेपाल टेलिकमको टावर जडान, स्थानीयमा खुशीको लहर

नवलपुर न्युज

२०८१ फागुन ३, शनिबार प्रकाशित (१ महिना अघि) ८५० पाठक संख्या

नवलपुर  । टावरका समस्याका कारण नेपाल टेलिकमको सेवा उपभोग गर्न नपाएर आजित भएका नवलपुरको दुर्गम क्षेत्रका बासिन्दा अब हर्षित बनेका छन्। टावर जडान भएपछि नेपाल टेलिकमका विभिन्न सेवा उपभोग गर्न पाउँदा स्थानीयहरूमा खुशीको लहर आएको छ।

विनयी त्रिवेणी ५ का स्थानीय अमरिश बाह्रघरेले भने, यहाँ ठूलो समस्या थियो। टावर जडान भएपछि अब सबै कुरा सहज भएको छ।

यसै हप्तादेखि विनयी त्रिवेणी गाउँपालिका ५ का विभिन्न दुर्गम बस्तीहरूमा नेपाल टेलिकमको टावर सञ्चालनमा आएको हो। लामो समयदेखि मोबाइल र इन्टरनेट सेवाबाट वञ्चित रहेका लाले, बाह्रबिसे, चिडिया, तिनदुमै, खाप्चा, खुम्बारी, कुसुण्डे, सपाङ्दी, गौरीझोक देउराली, र साविक धुर्कोट क्षेत्रका बासिन्दाहरू अब आधुनिक सञ्चार सुविधाबाट लाभान्वित हुने भएका छन्।

टावर नहुँदा यहाँका बासिन्दाले नेपाल टेलिकमको मोबाइल फोन र डाटा सेवामा असहजता भोग्दै आएका थिए। स्थानीय दीपक जिसीले भने, सञ्चार सेवाको अभावले विद्यार्थी, व्यवसायी, स्वास्थ्यकर्मी तथा सरकारी निकायलाई ठूलो समस्या थियो। अब भने यसले केही सहजता ल्याएको छ र स्थानीयहरूमा खुशी थपेको छ।

नवलपुर  क्षेत्र नम्बर  २ बाट निर्वाचित संघीय सांसद विष्णु  कुमार कार्कीले टेलिकमको टावर जडानका लागि लामो समय देखि गर्दै आएको पहलले सार्थकता पाएको बताउनुभयो। यसअघि, टेलिकमले बौँदीकाली गाउँपालिकामा पनि दुर्गम स्थानहरूमा टावर स्थापना गरी सेवा विस्तार गरेको थियो।