मध्यविन्दु नगरपालिकामा मानसिक स्वास्थ्य सम्बन्धी अभिमुखिकरण कार्यक्रम सम्पन्न

नवलपुर न्युज

२०८१ फागुन ६, मंगलबार प्रकाशित (१ महिना अघि) २६० पाठक संख्या

चोरमारा । मध्यविन्दु नगरपालिकामा मानसिक स्वास्थ्य र मनोसामाजिक सुस्वास्थ्य सम्बन्धी एकदिने अभिमुखिकरण कार्यक्रम सम्पन्न भएको छ। यस कार्यक्रमको अध्यक्षता मध्यबिन्दु नगरपालिका स्वास्थ्य शाखा प्रमुख जयश्वोर भुसालले गर्नुभएको थियो भने प्रमुख अतिथि नगर प्रमुख भिमलाल अधिकारी, विशिष्ट अतिथि प्रमुख प्रशासकीय अधिकृत शिशिर पौडेल र उपप्रमुख पूर्णकला चौधरीको उपस्थितिमा कार्यक्रम सम्पन्न भएको हो।

कार्यक्रममा प्रमुख अतिथी भिमलाल अधिकारीले मानसिक रुपमा अस्वस्थ व्यक्तिहरूको रुचि, चाहना र भावनालाई बुझेर काम अघि बढाउनु पर्नेमा जोड दिनुभयो। १६ वटा स्वास्थ्य चौकीका स्वास्थ्यकर्मीहरूलाई मानसिक स्वास्थ्य र मनोसामाजिक समस्याहरूका बारेमा अभिमुखिकरण गरिएको थियो।

कोसिस सस्थाको समन्वयनमा गरिएको यस कार्यक्रमले मानसिक अस्वस्थताको पहिचान र उपचारका तरिकाहरूको बारेमा छलफल गरेको थियो। वरिष्ठ सामाजिक कार्यकर्ता मन्जु छेत्रीले मानसिक अस्वास्थ्यको पहिचानका विषयमा जानकारी प्रदान गर्नुभएको थियो।

स्वास्थ्य शाखा प्रमुख जयश्वर भुसालले कोसिस सस्थाको कार्यप्रति खुशी व्यक्त गर्दै मध्यविन्दु नगरपालिकामा मानसिक स्वास्थ्य सम्बन्धी समस्याहरूको समाधानको लागि समन्वय गरिने बताउनुभयो। उनले स्वास्थ्यकर्मीहरूलाई मानसिक अस्वास्थ्यका चिन्हहरूको पहिचान गरेर उपचारका लागि समयमै पहल गर्न आग्रह गर्नुभयो।

कार्यक्रमको सहजीकरण मन्जु छेत्रीले, र सञ्चालन मिना कुमारी दुराले गर्नुभएको थियो। कार्यक्रमको दौरान मध्यविन्दु नगरपालिका स्वास्थ्य शाखाका कर्मचारीहरू, महिला बालबालिका तथा जेष्ठ नागरिक शाखा प्रमुख पुस्पा कुमारी रिजाल लगायतका व्यक्तिहरूको उपस्थिती थियो।