चितवनलाई नमूना जिल्ला बनाउनुपर्छ : अध्यक्ष दाहाल

२०७५ पौष १, आईतबार प्रकाशित (६ साल अघि) ११५९ पाठक संख्या

चितवन, नेपाल कम्युनिस्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ले देशैभरका मानिसको बसोबास रहेको र प्राकृतिक सम्पदाले धनी चितवनलाई विकासका दृष्टिले नमूना जिल्ला बनाउनुपर्ने बताएका छन्। 

आइतबार चितवनमा आयोजित एक कार्यक्रमका बोल्दै उनले भने, ‘सबैले आ–आफ्नो ठाउँबाट मिहेनत गरेर विकास निर्माण र समृद्धिको दृष्टिले चितवनलाई नमूना जिल्ला बनाउनुपर्छ।’ 

जिल्लामा नारायणी, राप्ती, रिउ जस्ता महत्वपूर्ण नदी रहेको तथा यहाँका जनताको मनोबल उच्च रहेको भन्दै अध्यक्ष प्रचण्डले विकास निर्माण र समृद्धिका काममा सबैले दिल खोलेर अगाडि बढ्नुपर्ने बताए। जिल्लामा सडक कालोपत्रेसँगै तटबन्ध सहितको चक्रपथ निर्माण कार्यका लागि प्रक्रिया अगाडि बढिसकेको भन्दै उनले तल्लो तहबाट निगरानी राख्न आग्रह गरे। 

गत निर्वाचनको समयमा सडकको धुलोमा हिँड्नु परेको चर्चा गर्दै उनले आगामी निर्वाचनसम्म यो समस्या भोग्नु नपर्ने बताए। आफू चितवन क्षेत्र नं ३ को सांसद मात्रै नभएर देशको पूर्वप्रधानमन्त्री, पार्टीको अध्यक्ष, संविधान निर्माण, निर्वाचन प्रक्रिया र सिङ्गो देशको शान्ति प्रक्रियामा महत्वपूर्ण भूमिका निर्वाह गरेको व्यक्ति भएकाले देशभर नै विकास र समृद्धि ल्याउन लागि परेको बताए।

प्रकाशित मिति : १ पुष २०७५, आईतवार ( रासस )